Biskupsstøðgarðurin

Dania O. Tausen er fjøllistakvinna av Toftum. Ein sangari, sangskrivari og yrkjari, ið altíð strembar eftir at skriva markvíðkandi føroyskar yrkingar og sangtekstir, eins væl og ljóðmyndir.

Dania vann í 2023 føroysku tónleikavirðislønina FMA fyri ársins fløgu fyri sína aðru plátu, ja/nei – og restin av vikuni, eins væl og hon í 2024 varð heiðrað við Ebbuvirðislønini, sum fer til ungar yrkjarar, ið hava serligar gávur.

Við eini bachelor í ritlist, strembar Dania altíð eftir at leggja ein serligan dám á føroyska málið, eins væl og at skriva viðkomandi tekstir, sum ofta eisini eru humoristiskir.

Síðani 2019 hevur hon givið tónleik út við bólkum sum Aggrasoppar og Reality Bytes, samstundis sum hon hevur arbeitt hjá plátufelagnum Tutl og verið við til at skipa fyri yrkingaupplestrum og konsertum kring oyggjarnar.

Hennara solodebutfløga gonguteigatúnatos kom út í 2021, eftir at prosayrkingasavnið Skál og fylgisdokumentarurin Skál komu út.

Við drúgvum royndum innan tað visuella, serliga við grafiskari list og marknaðarføring, eins væl og við útflutningi av føroyskari list í eitt nú útvarpssendingini Samværi (2023-2024), lesur Dania í løtuni grafiskt design á universtiteti í Oslo. Hon spælir tó enn tónleik samstundis og arbeiðir framvegis hjá Plátufelagnum Tutl.

____________________________________________________________________

Á Biskupstøðgarði verður sitið við borð við 4 plássum, so tað er umráðandi at bíleggja í einum ella viðmerkja, um tit ynskja at sita saman.

Lítli køkur hevur opið við brellbitum og Fjósið er opið.

Dyrnar lata upp kl 19:00 so tað er møguligt at finna seg til rættis, og at keypa sær okkurt gott at njóta, áðrenn tónleikurin byrjar kl. 20:00

Konsertin er stuðlað av Økistónum.